Gobernantzaren berrikuntzan dabiltzan ezagutza eragileen topaketa
- Egilea: Leire Cancio
Arratsaldeko ordu bietan eman zitzaion hasiera, pasa den azaroaren 9an, gobernantzaren berrikuntzan dabiltzan ezagutza eragileen lehenengo topaketari. Eguraldi lainotsua kanpoan utzita, Gandiaga Topagunearen estalpean bildu ginen 25 lagun, 13 ezagutza eragileetako kide (Arantzazulab, Agirre Lehendakaria Center, Aztiker, Deustuko Unibertsitatea, Etorkizuna Eraikiz Ikerketa, Eusko Ikaskuntza, Globernance, Mondragon Unibertsitatea, Orkestra, Telesforo Montzon eLab, eta UPV/EHUko Aktiba, Parte Hartuz eta Sinnergiak taldeak).
Lehen topaketa izanik, lehenik eta behin, elkar ezagutzeko erronda abiatu genuen. Horretarako, hurrenez hurren eta bost minutuko tartean, aurkeztu zuten gobernantzaren inguruan duten jarduna honako eragileek: Arantzazulab (Naiara Goia), Agirre Lehendakaria Center (Julen Larrañaga), Aztiker (Susana Martinez), Deustoko Unibertsitatea (Ion Muñoa), Etorkizuna Eraikiz ikerketa (Julen Cocho), Eusko Ikaskuntza (Beatriz Akizu), Globernance (Nahia Delgado eta Mikel Cabello), Mondragon Unibertsitatea (Andoni Eizagirre, Beñat Flores eta Aitor Zuberogoitia), Orkestra (Ainhoa Arrona, Mikel Gaztañaga eta Naia Begiristain), Parte Hartuz (Igor Ahedo), UPV/EHU (Antonio Casado eta Mario Zubiaga) eta Sinnergiak (Asier Lakidain).
Aurkezpenek, goi begiradatik bada ere, segituan azaleratu zuten ezagutza eragileen ekosistemaren aniztasuna. Aniztasun horren erakusle izan ziren azaleratutako begirada desberdinak: lankidetzazko gobernantzarena, gizarte berrikuntzarena, akordiorako zoruena, filosofia politikoarena, etikarena, giza eskubideena, demokratizazioarena, maila anitzeko gobernantzaren instituzionalizazioarena, dialogoarena, prozesu deliberatiboena, partaidetzarena, hiritartasunarena, subiranotasunarena, generoarena, politika publikoena, …
Jarduera motak ere askotarikoak izan ziren: oinarrizko ikerketa, ikerketa aplikatua, ikerketa-ekintza, esku-hartzeak, artekaritza, dibulgazioa, esplorazioa, sistematizazioa, fazilitazioa, deliberazioa, formakuntza, etab.
Behin gure burua kokatzeko lehen ariketaren ostean, “ekosistema” bezala kontzientzia hartzeko ariketa egiteari ekin genion: gai izango al ginen talde bezala duguna, edota ez duguna antzemateko? Eta, hortik abiatuta, elkarrekin bidea egiten jarraitzeari norabidea emateari ikusten al diogu zentzua?
Taldeetan bilduta, emankorra izan zen iritzi-trukea. Terminoak eta hurbilketak desberdinak izanik, bat egiten zen elkarlotutako gaiak zirela kontsideratzean, eta egon daitezkeen askotariko marko kontzeptualen konexioak/osagarritasunak eta kontrajarriak diren elementuak identifikatzea. Elkar ezagutza sustatzeko gune baten beharra azpimarratu zen, baita lehiatik lankidetzarako dinamika sustatuko duen espazioa eraikitzeko beharra.
Lau taldetan partekatu zen gaiaz aritzeko beharra, baita unearen irakurketa eta eraldatzeko asmoa ere.
Era berean, agertu ziren bestelako iritziak, gure buruarekin kritikoak izan eta ebaluazioa indartzearekin lotutako iritziak. Bide horretan, inpaktuari begira egotearen garrantzia nabarmendu zen, egiten den jardunaren argi ilunak modu kontzientean lantzeko helburuarekin.
Ekosistema edo ezagutza eragileen ekosistemari begira, elkartrukerako espazioa eta kontzientzia komuna lantzeko espazioa izatea ikusi zen oinarrian. Horretaz gain, ordea, ekosistemaren norabidea landu, bere iraunkortasuna bermatu eta eragile guztiontzako onura definitzearen erronka aipatu ziren.
Horraino, labur, saioak eman zuena.
Arratsaldeko 5etan, bidea elkarrekin segitzeko gogoz, agur egin genion elkarri, lainoa zabaldu eta eguzkia izkutatzen hasia zegoela.
Adostasun inplizitu bat airean geratu zen Gandiaga Topaguneko aretoan: terminoen eta praktiken aniztasunetik (bestea onartzetik) eraiki behar genuela ekosistema.
Segiko dugu eta eskerrik asko parte hartu zenuten guztioi!
